BUTUAN CITY – Padayon karung gibantayan sa ka-bomberohan ang natigayong sunog sa Purok Durian, Barangay San Agustin, Talacogon, Agusan del Sur nga milamoy sa usa ka sawmill company.
Sigon ni SFO2 Geline Chato Asis, Officer-in-charge kon OIC sa Bureau of Fire Protection kon BFP-Talacogon nga nagsugod sa pag-ulbo ang kalayu kagahapon sa alas 2:00 sa udtu apan bisan paman sa 10 ka oras nga ilang pakigkumbati, dili pa pwedeng biyaan ang maong lugar tungod sa hulga pa nga moulbo pag-usab.
Kini tungod kay ang nasunog mga waste materials sa sawmill company.
Atol sa pakighinabi ning sibyahan sa opisyal, anaa pa kini sa lugar nga grabe ka-aso, kauban ang mga BFP gikan sa San Luis og La Paz.
Padayon pa usab ang imbestigasyon sa posibleng hinungdan sa pag-ulbo sa kalayu ilabina kay nahitabo kini sa panahon nga grabe ka-init. Hinoon layu ra sa mga panimalay ang nasunog nga kompanya og kilid kini sa Agusan River.
Tambag nalang niini sa katawhan nga mag-amping og likayan ang paghaling-haling sa mga tinapok og kung dool kakuhaan sa tubig, magbisbis sa palibot aron mabasa.
