BUTUAN CITY – Gikumpirma sa Alegria Municipal Police Station pinaagi sa ilang social media post ang kamatayon sa usa ka opisyal sa pulis human kini nakuryentihan kagahapong adlawa sa Purok-4,Barangay San Pedro, Alegria, Surigao del Norte.
Naila ang biktima nga si Police Lieutenant Jerry C. Inocentes, 53 anyos, minyo ug residente sa nahisgutang lugar kansa naka-off duty atol sa maong insidente.
Sa impormasyong nakuha ning sibyahan, nahitabo ang insidente bandang alas 12:45 sa udto diin samtang naglingkod sa gawas sa ilang panimalay ang biktima, nagpatabang ang iyang bayaw sa pagbalhin sa metal scaffolding ngadto sa pikas balay.
Sa dihang gipas-an ang scaffolding, aksidente natandog sa live wire sa Surneco nga maoy hinungdan sa pagkakuryente ni Inocentes.
Daling gidala kini sa Kitcharao District Hospital sa Kitcharao, Agusan del Norte apan gideklarang dead on arrival sa attending physician nga si Dr. Michael John Escalante.
Samtang ang iyang mga kauban nga sila Rey Daplin, Randy Edillo ug Amping Limato nga naapil usab sa insidente ang gidala sa Saint Paul Hospital ug stable na ang ilang kahimtang.
