BUTUAN CITY – Subling maglusad og tulo ka adlaw nga transport strike sa tibuok nasud ang transport group nga Samahang Manibela, Mananakay at Nagkaisang Terminal ng Transportasyon kon mas nilang MANIBELA karong Abril 15 hangtud 17.
Sigon ni MANIBELA chairman Mar Valbuena, tumong nila nga aksyunan gilayon sa kagamhanan ang krisis karon sa lana lakip na ang pagtangtang sa value added tax kon VAT ug excise tax sa produktong petrolyo aron makuha-kuhaan ang palas-anon sa katawhan.
Gibana-banang anaa sa 500-mil ka mga drivers gikan sa nagkada-iyang sektor sa transportasyon ang mu-apil sa maong hunong-pasada sama sa jeepney, taxi, bus, ingon man Transportation Network Vehicle Services kon TNVS.
Dili na matud pa matulon ang gihimo sa mga mga oil companies tungod kay ang katawhan na gani ang nagbayad sa galastuhan sa ilang gi-angkat nga lana, unya sila pa ang nagpatuyang pagpasaka sa presyo niini.
Nasayrang sugdan na sa gobyerno ilabina sa Department of Transportation karong Miyekules, Abril 15, ang implementasyon sa service contracting program alang sa mga public utility vehicles kon PUV drivers.
Sigon ni Valbuena, segurado silang duna’y mga transport workers nga dili makabenepisyo niini ilabina nga hangtud karon, duna pa’y mga drivers nga apil sa susamang programa niadtong panahon sa COVID-19 pandemic, ang wala gihapon makadawat sa gipasi-atab nga ayuda.
Kini ilabina nga daghang mga drivers ang maglisod pag-comply sa mga rekisitos sama sa pag-secure og GPS tracking devices nga dugang palas-anon sa ilang kinitaan.
