BUTUAN CITY – Magpagawas og opisyal nga pamahayag ang Civil Aviation Authority of the Philippines kon CAAP sa musunod nga adlaw may kalabutan sa pagkahagsa sa cessna plane sa may Brgy Navarro, lungsod sa Tubajon, Dinagat Islands.
Apan sa karun, mohimo una og pormal nga imbestigasyon ang buhatan diin gibutyag ni Engr. Junelito Abrazado, regional manager sa CAAP-Butuan nga kaganinang buntag mibiyahe na padulong sa lugar nahitaboan ang personahe sa Aircraft Accident/Incident Investigation sa CAAP gikan sa Manila.
Kini usab ang rason nga dili pa makumpirma kung nakit-an naba ang black box sa maong eroplano.
Gikumpirma usab ni Engr. Abrazado nga lalaki ang piloto sa nahagsang abyon unya babaye ang iyang pasahero apan dili pa pwedeng ipagawas ang mga pangalan niini isip respeto usab sa pamilya.
