BUTUAN CITY – Muadto sa crash site sa Barangay Navarro, lungsod sa Tubajon, Dinagat Island Province ang mga imbestigador sa Civil Aviation Authority of the Philippines kon CAAP human ang pagkahagsa sa Cessna plane 182 Skylane nga adunay tail number RP-C2444 kagahapong sa hapon.
Kini ang gipa abot nga mensahe sa Bombo Radyo Butuan sa dihang mikuha og impormasyon ngadto sa CAAP-Butuan.
Apan sa karun nag-agad lang matud pa sila sa ihatag usab nga impormasyon gikan sa probinsiyal nga kagamhanan sa Dinagat Island.
Nasayrang base sa gipaabot nga mensahe gikan sa lokal nga residente nga si Jeson Tatierra nga dunay nakit-ang mga unod-unod sa gihimo nilang search operation apan dili kini makumpirma kung gikan ba kini sa tawo ilabina kay dunay kargang manok ang maong abyon nga padulong unta sa Siargao Island gikan sa Manila.
Nalubong matud pa ang maong abyon sa yuta rasong kinahanglan pa nila kining kaluton.
Sa pagkutlo ning balita, padayon ang ilang search and rescue operation bisan ug dunay pagbundak sa ulan.
