BUTUAN CITY – Kasamtangan nang nakig-alayon sa mga Vietnamese counterparts ang mga law enforcement agencies sa Pilipinas human nga gikataho nga nasigpatan sa Vietnam ang puganteng businessman nga maoy nag-unang suspek sa kaso sa missing sabungeros nga si Charlie Atong Ang.
Sigon ni Department of Interior and Local Government Secretary Juanito Victor “Jonvic” Remulla, mihimo na og mga diplomatic efforts ang gobyerno para sa pakig-estorya sa mga otoridad sa Vietnam aron masilib ang ilang immigration record og masiguro kung anaa ba gayud sa nasud ang most wanted fugitive.
Dugang pa niini, paspas nga masayran ang resulta ug kumpirmasyon kung anaa sa Vietnam si Ang tungod sa mga ongoing nga pakig-alayon ni Philippine National Police (PNP) Chief PGen. Jose Melencio Nartatez Jr. sa mga otoridad sa nasangpit nga nasud.
Samtang gisilib usab nga posibleng nakagawas sa nasud si Ang pinaagi sa backdoor sa Mindanao padulong sa Malaysia pipila ka semnana human nga migawas ang warrant of arrests batuk kaniya.
Sa karun, nakig-alayon na usab ang DILG ug uban pang katimbang nga ahensya alang sa pag-isyu sa red notice batuk kang Ang para sa hinanaling pagkaaresto sa pugante.
