BUTUAN CITY – Gilusad na sa NASA kaganina ang ilang pinakakusog nga rocket hangtod karon, ang Space Launch System, aron ipadala ang duna’y crews nga Artemis II paingon sa bulan—ang unang misyon nga adunay tripulante sulod sa kapin lima ka dekada.
Ang misyon milupad mga alas 6:35 sa gabii (EDT) gikan sa Kennedy Space Center sa Florida ug sulod lang sa pipila ka minuto human sa paglupad, gibutyag sa commander sa Artemis II nga si Reid Wiseman ngadto sa mga operators sa yuta nga ilang nasaksihan ang nindot nga pagsubang sa buwan nga maoy ilang padulngan.
Ang upat ka miyembro sa crew—lakip sila Victor Glover, Christina Koch, ug Jeremy Hansen sa Canadian Space Agency—gilauman nga mosulod sa orbit sa bulan sulod sa mga unom ka adlaw. Dili sila molanding sa bulan, apan mulibot ra niini una mobalik sa Yuta.
Ang duha ka oras nga launch window nagsugod mga alas 6:24 sa gabii, ug kadaghanan sa pre-flight checks nahuman og maayong resulta. Apan, human mosakay ang crew, napugos ang mga opisyal sa NASA sa pagsulbad sa duha ka problema sa flight termination system sa rocket apil na ang problema sa baterya sa launch abort system sa Orion.
Kini nga sistema maoy mopagawas sa kapsula palayo sa rocket kung adunay problema sa panahon sa paglupad. Nakamatikod ang NASA og isyu sa temperature readings sa baterya, apan nasulbad kini sa wala pa ang naka-iskedyul nga paglansad.
Ang 10 ka adlaw nga biyahe mao ang unang crewed flight paingon sa bulan sulod sa kapin 50 ka tuig ug mao usab ang pinakalayo nga distansya nga nabyahe sa mga tawo gikan sa Yuta. Mga siyam ka minuto human sa paglusad, misulod ang Artemis crew sa orbit, nagbiyahe og mga 15,000 milya kada oras.
Samtang naa pa sila sa orbit sa Yuta, adunay daghang buluhaton nga kinahanglan nilang buhaton sa dili pa sila mopadayon paingon sa bulan. Ang Artemis I nga misyon niadtong 2022 nakalibot na sa bulan, apan wala kini’y sakay nga crew.
