BUTUAN CITY – Gibombahan sa wala pa nailang mga suspek ang usa ka patrol car sa Rajah Buayan Municipal Police Station sa Barangay Sapakan, lungsod sa Rajah Buayan, Maguindanao Del Sur ning buntaga.
Sumala sa taho, miresponde ang mga pulis sa balay sa Municipal Administrator human makadawat og impormasyon mahitungod sa nahiunang pagbusikad sa lugar diin ang maong balay gipanag-iyahan sa kabanay ni Rajah Buayan Mayor Bai Maruja Ampatuan Mastura.
Samtang miresponde, usa ka pagbusikad ang misugat sa patrol car og dayun gibanhigan sa wala pa mailang mga armadong lalaki.
Gikumpirma ni Police Captain Steffi Salanguit, tigpamaba sa PRO BAR, walay nasamdan sa mga ginsakpan sa kapulisan bisan paman sa pagbusikad.
Padayon pang gipaabot sa kapulisan ang kumpletong detalye mahitungod sa insidente samtang gihimo ang imbestigasyon.
Narekober ang gidudahang Improvised Explosive Device (IED) nga gituyo sa pagtanom sa lugar.
Nagpabiling naka-red alert ang kapulisan sa rehiyon tungod sa “pattern” sa mga pag-atake sa mga law enforcers sa probinsya diin ang pinaka-ngilngig nga nahitabo didto sa Shariff Aguak diin 5 ka pulis ang namatay sa pag-ambush.
