BUTUAN CITY – Nakatala ang Department of Labor and Employment kon DOLE-Caraga og 55 ka rehistradong aplikante sa gipahigayong job fair dinhi sa dakbayan sa Butuan kondiin tulo kanila ang Hired-on-the-spot (HOTS), samtang 32 ang adunay dako nga posibilidad nga madawat sa trabaho.
Kini human naghanyag og 800 ka mga bakanteng trabaho ang DOLE uban sa 13 ka local construction companies alang sa mga trabahante nga nawad-an og trabaho sa construction industry.
Abli usab kini alang sa mga bag-ong graduates ug displaced workers nga naapektuhan sa krisis tungod sa padayon nga pagsaka sa presyo sa lana.
Sumala ni Atty. Jason Balais, Regional Director sa DOLE Caraga, ang maong job fair tubag sa direktiba ni Pangulong Ferdinand Marcos Jr nga mahimong lifeline ang ahensya niining panahona nga naglisod ang mga trabahante.
Ang maong job fair kabahin usab sa commitment sa ahensya ubos sa “Project DAPAT” o DOLE Action Plan and Transition, nga nagtinguha sa paghatag og paspas nga transisyon, ayuda, ug bag-ong oportunidad sa trabaho alang sa mga apektadong trabahante.
Gawas sa mga bakanteng trabaho, aduna usa’y One-stop-shop service alang sa mga kinahanglanon sa aplikasyon sa trabaho, uban sa partisipasyon sa nagkalain-laing ahensya sa gobyerno sama sa NBI, SSS, PhilHealth, ug Pag-IBIG.
