BUTUAN CITY – Gikumpirma ni Senate Ad Hoc Committee chairperson Sherwin Gatchalian nga magpahigayon og unang pagdungog ang komite sa Martes, Marso 24 may kalabutan sa epekto sa krisis sa misamot nga kagubot sa Middle East sa nasud.
Sigon ni Gatchalian nga susihon sa komite kung igo ang pondo sa General Appropriations Act 2026 aron matubag ang epekto sa krisis nga hatud sa tensyon tali sa Estados Unidos, Israel ug Iran.
Sumala pa niini nga dapat dunay naka-andam nang mga lakang ang gobyerno aron matabangan ang mga direktang apektado sama sa mga tsuper ug motorista nga naigo sa taas nga presyo sa lana.
Dugang pa sa senador, mamahimong maapektuhan ang food security tungod sa pagsirado sa Strait Hormuz nga maoy importanteng ruta sa pangkalibutanong negosyo sa lana, natural gas ug bisan ang fertilizer.
Gitakda ni Gatchalian ang pagdungog bisan og naka-break ang Kongreso sa panahon sa Holy Week.
Matud pa niini kinahanglang magsumite ang mga ahensya sa gobyerno sa ilang contingency plans nga mamahimong usahon lakip ang pagpangandam sa worst-case scenarios.
Alayon niini, gisugyot sa senador ang pagdaginot sa gobyerno, lakip ang, pagbawas sa work travel, pagbalhin sa online training ug limitasyon sa representation expenses nga mamahimong muabot sa 90 bilyones pesos ang madaginot sa gobyerno sa ingon ini nga lakang.
Samtang taliwa sa krisis nanawagan usab si Gatchalian sa mga oil company nga dili pahimuslan ang sitwasyon.
Naglaum kini nga makabaton og konsensya ang mga niini og molikay sa hoarding ug dili makatarunganong pagtaas sa presyo sa lana.
