BUTUAN CITY – Gisiguro sa Department of Agriculture (DA) ug bisan sa Food Terminal Inc. (FTI) nga igo ang supply nga duna ang gobyerno alang sa pagpadayon sa Benteng Bigas Meron na kon BBM program.
Sigon ni Agriculture Secretary Francisco Tiu Laurel Jr., padayon ang gihimong replenishment sa National Food Authority (NFA) sa ilang mga stock aron masiguro nga magpadayon ang pagbaligya niini sa mga Kadiwa Stores nga abli na sa tibook nasud.
Sumala pa niini nga nasabtan sa ilang buhatan nga posibleng maghatud sa stocking anxiety ang ongoing armed conflict sa Middle East ilabina sa mga vulnerable sector.
Apan gitumbok sa kalihim nga ang pag-aksyon tungod sa kabalaka o panic posible lang nga magpasamot sa kasamtangang sitwasyon.
Pagseguro pa ni Tiu Laurel, dunay igong buffer stock ang nasud tungod na usab sa maayong ani karun nga tuig.
Dili usab matud pa kinahanglang mabalaka ang publiko ilabina ang mga benepisyaryo sa programa tungod kay padayon nga mahimong available ang pag-apod-apod sa bugas hangtud kini nakarehistro sa Benteng Bigas Regsitry System.
Samtang aron masiguro usab nga malikayan ang hoarding sa mga bugas nga gibaligya sa ilalom sa programa, hugot nga gipatuman sa departamento ang pagpalit og hangtud sa 10 kilos sa bugas kada adlaw kada benepisyaryo.
