BUTUAN CITY – Gihikay na sa mga otoridad ang pagpasaka og kaso batuk sa 23-anyos nga si alyas Sultan Kinento, residente sa Taguig City, Metro Manila human nakuhaan og balor sa 95.2-milyunes pisos nga kantidad sa suspected shabu kansa gisulod sa ligid sa sakyanan.
Atol kini sa gilusad nga interdiction operation kaganinang alas-4:45 sa kaadlawon sa may Lipata Port sa Surigao City pagpanguna sa Surigao Component City Police Office, Philippine Drug Enforcement Agency kon PDEA-Caraga ug uban pang law enforcement agencies.
Sa eksklusibong pakighinabi sa Bombo Radyo Butuan, gipadayag ni PDEA-Caraga spokesperson Dindo Abellanosa, nga ang sunod-sunod nga malampusong operasyon adiser ang pinaka-ulahing interdiction operations, resulta sa hini-usang paningkamot ilabina nga sukad nadestino ning rehiyon ang ilang director nga si Laurifel Gabales, milibot na kini sa entiro rehiyon ug gipangayo na ang kooperasyon sa mga local government units alang sa malampuson niyang tinguha nga masanta na ang operasyon sa ginadiling druga ning rehiyon.
Wala usab nila gisalindot ang posibilidad nga kabahin sa usa ka dakong drug syndicate ang nadakpang suspetsado ug kini ang gipalawman nila nga imbestigasyon aron makuha ang mga contacts niini pinaagi sa nakuha nilang cellphone sa suspetsado.
Mapasigarbuhon usab niining gitaho nga sa 18 ka mga rehiyonal nila nga buhatan sa tibuok nasud, ang Legal and Prosecution Unit sa ilang ahensya dinhi Caraga Region ang nanguna sa nakapa-konbikto og mga drug personalities sa mga kasong ilang gipasaka.
Mangunay matud pa si Director Gabales pag-uban sa korte aron masigurong wala’y muhungaw nga teknikalidad sa ilang gipasaka na ug ipasaka pang mga kaso.
