BUTUAN CITY- Pormal na nga gitudlo ni President Ferdinand Marcos Jr. si kanhi Tourism Sec. Christina Garcia Frasco isip Presidential Adviser for Sustainable and Resilient Communities, human ang pila ka simana nga espekulasyon kalabot sa pagkanaog niini isip Secretary sa Department of Tourism.
Sumala sa Malacañang, gitahasan sa Presidente si Frasco nga manguna sa pagpalig-on sa implementasyon ug sa malungtarong pagpatuman sa mga prayoridad nga national program sa lebel sa komunidad, partikular sa mga lugar nga kasagari makasinati ug kataldman ug climate-related risks.
Dungan sa bag-o niining katungdanan, si DOT Undersecretary Verna Buensuceso ang magsilbing officer-in-charge sa Department of Tourism aron masiguro ang padayon nga operasyon sa ahensya.
Ang appointment ni Frasco ming-abot taliwala sa mga batikos nga nadawat niini kalabot sa “self-promotion” sa tourism materials sa gobyerno, butang nga hugot usab niining gilimod.
Taliwala sa kontrobersiya, nagpabiling taas ang pagtuo sa Presidente sa inigridad niini, rason sa pagtudlo niini sa halapad nga papel nga nakapukos sa pagpalig-on sa mga komunidad.
Ang maong lakang mipakita isip parte sa mas halapad nga inisyatibo sa administrasyon aron matubag ang epekto sa climate change ug extreme weather events sa nasud, hilabina nga bag-ohay lang gitaho sa Philippine Atmospheric, Geophysical and Astronomical Services Administration (PAGASA) ang mas kanunay nga pagdanas sa grabe nga bagyo ug heat waves sa rehiyon.
Sa bag-ong posisyon, gilaomang mahimong sentro si Frasco sa pagpatuman og mga programang pang-komunidad kansa mag-asdang sa kalig-on ug pagmintinar sa panginabuhi-an sa mga Pilipino.
