BUTUAN CITY- Nangita na ang Pilipinas og mga alternatibong makuhaan og lana aron masiguro ang lig-on nga supply sa gasolina taliwala sa walay kasiguraduhan sa pangkalibotanong merkado.

Sa Press Briefing niadtong Martes Marso 10 sa New York, sigon ni Pangulong Ferdinand Marcos Jr. nga nakigpulong na ang panggamhanan sa ubang mga nasud nga nagsupply og lana.

Sumala pa ni President Marcos, nga ang nag-unang problema karun mao ang wala pay kasiguraduhan kung hanggtod kanusa molongtad ang lihok sa presyo sa mga produktong petrolyo sa global market tungod sa natigayong geopolitical tensions.

Gibutyag usab sa Pangulo nga walay kasiguraduhan usab kung unsa ka-taas ang natigayong tensyon sa Middle East nga naka-apekto sa lihok ug presyo sa oil products sa tibuok kalibotan.

Apan pagsiguro sa Pangulo, nga nagpabiling nakapukos ang administrasyon aron amsiguro ang lig-on ug barato nga suplay sa lana sa Pilipinas.

Samtang, gisiguro usab ni President Marcos nga padayong minghimo og lakang ang panggamhanan aron mapugngan ang nagpadayon nga pagsaka sa presyo sa mga nag-unang palaliton sa nasud.

Sumala sa Presidente, naningkamot ang gobyerno nga mamintinar ang ubos nga presyo sa mga produkto, apan giangkon niini nga adunay mga hinungdan nga dili direktang kontrolado sa gobyerno.

Gibutyag usab sa Presidente nga bag-ohay lang ming-abot sa kapin $100 matag bariles ang presyo sa lana sa pangkalibotanong merkado, kansa nakapahinabo og kabalaka sa gobyerno. Bisan paman, ming-ubos na kini karun sa $90 matag bariles.

Bisan paman nga ming-ubos kini kumapara sa nag-unang lebel, sigon ni Pangulong Marcos nga mas taas gihapon kini tungod nagsugod ang presyo sa lana sa labing-minus $72 matag bariles.