BUTUAN CITY- Nagpadayon ang kasamok ug tensiyon sa Middle East nga nakaapekto sa Kuwait, diin gibana-banang kapin sa 100 ka missile ug drone attacks matag adlaw ang nasinati sa mga residente.
Sumala ni Bombo International Correspondent sa Kuwait Emerita Gernita Gitgit, nga halos adlaw-adlaw silang makadungog ug makakita sa pagpabuto, apan niadtong Huwebes nakasinati sila og kalinaw ug nagtuo nga humana na ang maong hulga.
Gani niadtong mi-aging adlaw sa alas 4:30 sa buntag, human sa ulahing pag-ampo, usa ka missile gikan sa Iraq nga giingong gipagawas sa Iran tungod sa presensya sa base militar nga anaa sa maong nasud, misulod ug mingbuto ibabaw sa usa ka building nga gipuy-an niini uban sa ubang mga residente.
Gibutyag usab ni Gitgit, nga nasuta nga ang target matud pa sa maong pagpamomba mao ang kampo militar nga duol ra sa lugar, mga napulo ka minuto ang gilay-on. Gani ang maong missile na-intercept sa US military nga nakabase sa Kuwait, apan didto gihapon sa ibabaw sa balay kini mibuto, hinungdan sa dakong kahadlok ug kabalaka sa mga lumulupyo.
