BUTUAN CITY- Nanawagan ang Department of Social Welfare and Development (DSWD) pinaagi sa National Authority for Child Care (NACC) sa mga social media platforms sama sa Meta nga hugtan ang pagbantay batok sa online baby selling ug ilegal nga adoption groups, human masuta nga adunay mga Facebook groups nga nagbaligya og bata gikan P8,000 hangtod P130,000 ug adunay libo-libong miyembro.
Sumala ni Rowena Macalintal sa NACC, nakig-alayon na ang ahensya sa PNP ug Women and Children Protection Center alang sa operasyon ug entrapment activities, apan gipasiugda nga manubag sa balaod ang mga sellers ug buyers.
Gipunting usab nga ang lehitimong proseso sa adoption molungtad lamang og siyam ka bulan kung sundon ang hustong dokumento, ug gidasig ang mga ginikanan nga dili na makabantay sa ilang anak nga muduol sa NACC, DSWD offices, o lisensyadong child care facilities alang sa tukmang counseling.
Nangayo usab siya og pormal nga dialogue tali sa gobyerno ug Meta aron ipagbawal ang mga grupong supak sa balaod.
