BUTUAN CITY – Misaludar ang usa ka legal expert ngadto kang Nicholas Kaufman, abogado ni Kanhe Pangulong Rodrigo Duterte human ang confirmation of charges hearing nga gihimo sa International Criminal Court.
Sigon ni Atty. James Reserva sa eksklusibong pakighinabi ning sibyahan nga dili kabayran ang gipakita nga abilidad ni Kaufman nga makita gayud ang iyang kamaayo.
Gane daw nabulaga ang prosecution basta si Kaufman na ang mosulti tungod kini sa dili ti-aw nga gihimong research.
Nagpakita matud pa kini sa abilidad usab ni Vice President Sara Duterte nga maoy mipili kang Kaufman nga manguna sa legal team.
Samtang gihulagway usab niini nga lousy o luya ang prosecution nga halatang nagsalig lang sa iyahatag kanila nga scripted nga mga speeches og wala mihimo sa saktong pagduki-duki.
Gane makonektar kini sa gibulgar sa 18 ka Marines nga matud pa nagpa-ayahay lang ang mga imbestigador sa ICC dinhe sa Pilipinas tungod kay wala mihimo gyud kini og pagpangaylap og impormasyon kundi ang gihinabi kadto lang mga tawo nga gi-refer kanila ni Sonny Trillanes IV.
Una nang gibutyag ni Atty. Reserva nga kung ebidensiya ang basehan, wala gyuy dag-anan ang prosecution tungod kay ang ilang gibasehan mao lang ang mga portion sa pamahayag sa presidente.
Nagbutang usab sila og witness nga makonsiderang polluted na nga sources rasong questionable ang kridibilidad niini.
Apan bisan paman niini, miangkon ang abogado nga nawad-an na gihapon siya og paglaum nga makabalik pa sa nasud ang kanhe presidente tungod kay ang isyu niini mao naman ang relevance sa ICC ug dili sa ebidensiya.
Sumala pa niini nga gigamit lang nila si Kanhe Pangulong Duterte nga tropeo aron ipakita nga nag-exist pa ang ICC og mawala ang ideya nga inutil sila og walay gibuhat human dili ma-enforce ang ilang mekanismo ngadto sa mga dagkong lider sama nil Russian President Vladimir Putin og Israeli Prime Minister Benjamin Netanyahu.
