BUTUAN CITY – Gisaysay usab ni Amon Laguras, usa ka trabahante sa construction company nga dunay gitrabaho sa maong dapit ang nasaksihan nga pagdahili sa yuta kagahapon.
Sumala pa niini nga tungod sa kusog nga ulan, daan na siyang misulti sa iyang kauban nga anaa sa bunkhouse nga duna gyuy mahitabo nga landslide nga natinood pila ka minuto lang ang milabay.
Nag-anam matud pa pagdahili ang yuta gikan sa babaw rasong nanggawas sila sa balay samtang dunay sakyanan nga daling mi-atras human nakita ang paglihok sa yuta.
Mas delikado matud pa kadto kung gabii nahitabo.
Samtang sa kabahinan usab sa residente sa maong dapit nga si Junrey Cabacas, kansa duha ka tuig nagtarok ug balay sa maong dapit, mibati gayud sila og kahadlok ugaling panahon sa ting-ulan ilabina kay kaduha ka higayon nang midahili ang maong dapit.
Apan wala matud pa silay kabalhinan rasong didto ra gihapon sila magpuyo og motuman lang sa abiso sa barangay nga kung ting-ulan mobakwit gayud.
Sa nahitabo kagahapong adlawa, nakita gayud matud pa nila ang yuta nga mitabon sa tibook dalan./
