BUTUAN CITY – Kumpirmadong napatay usab ang babayeng pedestrian nga nalambigit sa dugoong disgrasya sa nakalabay nga gabii sa may National highway particularly sa atubangan sa URATEX building, KM 4 Brgy. Libertad, Butuan City pasado ang alas 11:10 ang takna sa gabii.
Kini base na usab sa impormasyong nakuha ning sibyahan.
Una nang nailhan ang biktima nga si Leiuola Prova Orelle Galiste, 20-anyos, nga taga P-13 A San Vicente, Butuan City human kini nakabsan sa kinabuhi. Tungod niini, duha na ang napatay sa maong panghitabo.
Ang napatay nga olitawo nga si Ethan Russ Del Rosario Arante, 22-anyos, olitawo samtang angol usab ang iyang igsoon nga backrider nga 17-anyos kansa nakagawas na sa ospital og parehong residente sa P-8 Brgy 3, Buenavista, Agusan del Norte.
Sa gihimong imbestigasyon, gisaysay sa nakasaksi nga si Christopher Gabor, nga nagbiyahe siya niadtong tungora sa JC Aquino highway pa-sidlakang bahin sa dihang dunay tulo ka single motor nga mi-overtake kaniya og kusog ang dagan.
Sa lugar diin nahitabo ang aksidente, ang MC Raider 150 nga kolor puti og itom, na-iwit og maoy nakabangga sa patabok nga babayeng biktima. Tungod sa kakusog sa impact, ang nakasakay sa single motor og ang nabanggaan nga pedestrian, nangalabay og naka-angkon sa dili tiaw nga pali sa kalawasan.
Nakaresponde usab ang ambulance personnel gikan sa ALIMAT og Bureau of Fire Protection ambulance diin gidala ang magsoong sakay sa single motor ngadto sa Agusan Del Norte Provincial Hospital apan gideklarang dead-on-arrival ang magulang pasado alas 11:35 sa gabii pinaagi sa attending physician nga si DR. Roey Yee.
Tungod niini, hugot ang pahimangno sa Butuan City Government ngadto sa mga motorista nga respetuhon ang pedestrian lane pinaagi sa pagpahinay sa dagan, pag-anticipate nga dunay motabok og kung dunay motabok, mohunong gyud kini. Kini ilabina kay nisunod sa maong aksidente ang batang nabanggaan usab sa samang barangay sa dihang patabok kini sa dalan.
