BUTUAN CITY – Mikutlo sa kinabuhi sa usa ka estudyante ang natigayong disgrasya sa kadalanan kagabii alas 11:10 ang takna sa National highway particularly sa atubangan sa URATEX building, KM 4 Brgy. Libertad, Butuan City.
Naila ang napatay nga olitawo nga si Ethan Russ Del Rosario Arante, 22-anyos, olitawo samtang angol usab ang iyang igsoon nga backrider nga 17-anyos og parehong residente sa P-8 Brgy 3, Buenavista, Agusan del Norte.
Sa gihimong imbestigasyon, gisaysay sa nakasaksi nga si Christopher Gabor, nga nagbiyahe siya niadtong tungora sa JC Aquino highway pa-sidlakang bahin sa dihang dunay tulo ka single motor nga mi-overtake kaniya og kusog ang dagan.
Sa lugar diin nahitabo ang aksidente, ang MC Raider 150 nga kolor puti og itom, na-iwit og maoy nakabangga sa patabok nga babayeng si Leiuola Prova Orelle Galiste, 20-anyos, nga taga P-13 A San Vicente, Butuan City.
Tungod sa kakusog sa impact, ang nakasakay sa single motor og ang nabanggaan nga pedestrian, nangalabay og naka-angkon sa dili tiaw nga pali sa kalawasan.
Nakaresponde usab ang ambulance personnel gikan sa ALIMAT og Bureau of Fire Protection ambulance diin gidala ang magsoong sakay sa single motor ngadto sa Agusan Del Norte Provincial Hospital apan gideklarang dead-on-arrival ang magulang pasado alas 11:35 sa gabii pinaagi sa attending physician nga si DR. Roey Yee.
Samtang ang pedestrian usab gidala sa Butuan City Medical Center.
Ang nalambigit usab nga single motor, gikustudiya sa Butuan City Police Station-3 alang sa tukmang disposasyon.
