BUTUAN CITY – Siento-porsiento nang plantsado ang seguridad sa kapulisan sa Surigao City alang sa himuong Caraga Regional Athletic Games kon CRAG 2026 nga himuon sa maong siyudad sa Marso 9 hangtud 20 ning tuiga.
Sa eksklusibong pakighinabi ning sibyahan, gipadayag ni PLCol Mariano Lukban, ang hepe sa Surigao City Component Police Station, nagpatawag na si Surigao del Norte Governor Robert Lyndon Barbers og security briefing diin didto nila gihikyad ang ilang security framework aron masiguro ang kaluwasan sa mga delegado.
Gipadayag sa opisyal nga ang matag-billeting area, butangan nila og tag-unom ka mga pulis sulod sa 24-oras apil na ang mga venues sa mga dula.
Karon pa lang, nagbutang na sila og mga duty police sa pipila ka mga tunghaan alang sa Surigao del Norte contingents nga sayong mi-ukupa sa ilang billeting quarters tungod sa ilang mga praktis.
Samtang ang traffic management unit sa lokal nga kagamhanan, plastado na usab rason nga fully prepared na sila alang sa maong tinuig nga padula.
Dili na usab matud pa kinahanglanon ang dugang pwersa sa kapulisan tungod kay ang duha ka company sa Provincial Mobile Force, magpadala man og tag-50 ka mga sakop nga madugang sa mga personaheng ila usab nga gikuha gikan sa mga municipal police stations sa lalawigan.
Kini wala pa’y labot sa mga support personnel gikan sa ilang mga counterparts sa Philippine Army, Philippine Coast Guard, ug uban pa nga magsiguro sa seguridad sa 20 ka mga billeting areas gawas pa sa mga playing venues.
