BUTUAN CITY – Gitumbok ni Manila 6th District Representative Bienvenido Abante Jr. ang affidavit sa detainee nga si Ramil Madriaga, nga nagpailang bagman matud pa ni Vice President Sara Duterte, isip“smoking gun” o pinakalig-on nga ebidensiya sa ikaupat nga reklamong impeachment batuk sa Bise Presidente.
Kini ang nahimong tubag sa magbabalaod sa dihang napangutana kung unsa ang kalahian sa ilang gi-endorsong reklamong impeachment batuk sa Bise Presidente gikan sa naunang tulo ka reklamo.
Bisan paman niini, daghan matud pa ang pagka-pareha sa ilang complaint sa naunang impeachment ni VP Sara, lakip na ang culpable violation of the Constitution, betrayal of public trust, graft and corruption, other high crimes, bribery ug uban pa.
Sa nasangpit nga forum, gipadayag ni Abante nga gikuptan niya ang affidavit ni Madriaga nga nagpakita sa matud pa “very close” nga koneksiyon niini sa Bise Presidente.
Sumala Abante, gikuha ni kanhe Pangulong Rodrigo Duterte si Madriaga tungod sa kahibalo niini og eksperto sa imbestigasyon ug pag-ispiya.
