BUTUAN CITY – Padayon karun ang gihimong rescue and retrieval operation sa mga otoridad sa usa kabatan-on nga na-missing human nga miambak sa Binongan Bridge sa lungsod sa Veruela, Agusan del sur kagahapong adlawa.
Nasayrang bisan paman sa kadako na sa baha, naligo matud pa nga biktima kauban ang iyang higala diin nag-ambak-ambak kini sa maong tulay.
Makita sa mikaylap nga video nga gisulayan pa sa higala niini nga luwason ang biktimang 18-anyos nga taga Santa Josefa, Agusan Del Sur apan gibuhian nalang kini sa higala tungod kay dili na usab niya kaya.
Sumala sa facebook post ni Froctuso Marquez, gibuhat na matud pa niya ang tanan apan dili na gayud niya makaya nga luwason pa ang iyang higala.
Hangtud sa pagkutlo ning balita, wala pa nakit-an ang biktima.
