BUTUAN CITY – Muabot na sa 93, 756 ka indibidwal o 23, 860 ka pamilya gikan sa 61 ka barangay sa tibook Caraga Region ang apektado sa mga pagbaha nga hatud sa walay hunong nga pag-ulan tungod sa nagtunhay nga Shearline. Sigon ni Carlo Bicera.
Tigpamaba sa Office of the Civil Defense kon OCD-Caraga nga lakip sa gitutukan sa karun ang Bislig City diin dunay tulo ka barangay ang gibaha diin usa niini nga mao ang Barangay Tabon, dunay gipahigayon nga rescue operation tungod sa baha nga naa na sa mga panimalay. Tungod niini, 25 ka evacuation center na ang gi-ablihan samtang 794 ka pamilya ang nagpasilong.
Laumang mosaka pa ang maong ihap sa mga apektadong indibidwal ilabina kay nagpadayon pa ang gihimong pagpamakwit sa katawhan didto sa Agusan Del Sur.
Gidugang usab ni Bicera nga dunay 3 ka landslide ang ilang natala nga gikan sa lungsod sa Veruela og Trento parehong sakop sa Agusan Del Sur.
Hinoon wala silay natalang casualty samtang ang mga national highway og mga tulay padayon pang ma-agian.
Samtang gikumpirma usab ni Bicera nga anaa na sa critical nga level ang dagkong suba ning rehiyon gikan sa Agusan Del Sur padulong dinhe sa siyudad sa Butuan nga Agusan River.
Tungod niini, gi-preposition na sa provincial Disaster Risk reduction and Management Council ang ilang mga water assets ngadto sa mga barangay nga ma-apektuhan sa pag-apaw sa tubig gikans sa suba aron dali silang maka-responde.
