BUTUAN CITY – Subling nagpahimangno ang Department of Health (DOH) ngadto sa publiko nga dili lamang sa Valentine season angay ipraktis ang luwas nga pakighilawas kundili sa tibuok tuig.
Sumala sa DOH, ang safe sex makatabang aron malikayan ang sexually transmitted infections (STIs), wala damhang pagbuntis, ug nagsilbi usab nga epektibong pamaagi sa family planning.
Tambag sa ahensya, ilabina sa mga anaa pa sa “dating stage” o wala dili pa kasado, dili kalimtang mugamit og proteksyon sama sa condom, lubricants, ug pre-exposure prophylaxis (PrEP).
Gidugang pa sa DOH nga importante usab ang pagtahod sa consent ug personal nga boundaries sa usa’g usa sa bisan unsang physical intimacy.
Dungan niini, giklaro sa DOH ang padayon nga pagsaka sa kaso sa HIV sa nasud, diin kapin sa 1,400 ka bag-ong kaso ang natala gikan Nobyembre hangtod Disyembre 2025.
Alang sa mga single, gipahimangnoan sa DOH nga maghatag og panahon alang sa kaugalingon pinaagi sa self-love ug pag-atiman sa mental health tungod kay ang tinuod nga gugma makita sa pagpanalipod sa kaugalingon ug sa kaayohan sa ubang mga tawo sa palibot.
