BUTUAN CITY – Hugot nga gibarugan ni Richard ‘Loloy’ Angao Jr, presidente sa Libertad Motorized Tricycle Operators and Drivers Association kon LIMTODA nga dili sila musugot nga basta-basta na lang mawad-an sa ilang panginabuhian tungod sa bag-ong tricycle route plan nga ipatuman sa City Transportation and Traffic Management Department kon CTTMD-Butuan.
Sa eksklusibong pakighinabi sa Bombo Radyo Butuan, gipadayag niini nga ubay-ubay nga mga isyu ang angayang resolbahon sa unang nagkupot nilang kooperatiba nga mao ang Libertad-wide Transport Cooperative kon LWTC.
Apil na niini ang paghangyo sa nagsilbi nilang presidente nga kuptan ang maong posisyon bisan wala mi-agi og eleksyon ingon man ang pagtudlo sa iyang asawa isip tresurera nga wala gihapon mi-agi og eleksyon.
Dihang ila kining gikunsulta sa Cooperative Development Authority kon CDA, didto nila nasayran nga bawal kini apan mao gihapon matud pa ang gipatuman sa ilang presidente rason sa ilang pag-apply isip lahi usab nga kooperatiba ubos sa Villa Kananga Transport Cooperative kon TRANSCOVIL.
Gibutyag niining duha ka tuig na matud pa ang ilang aplikasyon ug migasto na sila og dili mu-ubos sa 50-mil pisos apan hangtud karon, wala pa gihapon aksyuni ang ilang aplikasyon taliwa sa ilang kasibot nga legal silang maka-operate tungod kay gibabag-babagan matud pa kini sa taga-CTTMD.
