BUTUAN CITY -Magpatukod ang nasudnong kagamhanan og kapin sa 4-mil ka mga bag-ong classrooms aron matubag na ang kakulangon sa mga lawak-tunghaan sa tibuok nasud.
Gipadayag kini ni Pangulong Ferdinand ‘Bongbong’ Marcos Jr human gipirmahan ang memorandum of agreement tali sa Department of Education ug sa mga local government units kaganinang buntag nga gipahigayon sulod sa Palasyo sa Malakanyang.
Gibutyag sa pangulo, sinugdanan pa lang kini sa mas palapdang classroom-building program sa iyang administrasyon dungan sa pagbutyag nga mu-abot sa 145-mil ka mga classrooms ang kulang sa entiro nasud, rason nga napugos pagpatuman og multiple shifts ang mga tunghaan ug duna usa’y mga estudyanteng nagtuon sa ma basketball courts ug ilalom sa mga punuan sa kahoy.
Ilalom sa partnership, ang Department of Education ang magtakda og patakaran, desenyo ug pundo samtang ang local government unit ang manguna sa procurement ug actual construction sa mga niini sa ingon mapaspasan ang proseso ug malikayan ang pagkalangay sa maong proyekto.
