BUTUAN CITY – Gipadayag ni kanhi Ifugao representative Teddy Baguilat nga ang mga kampo nila Senador Bam Aquino ug Senador Risa Hontiveros nagsugod na sa ilang seryoso nga pagpangandam alang sa 2028 presidential elections.
Suma sa mga supporters ni kanhi bise presidente ug karon Mayor sa Naga City nga si Leni Robredo, bukas sila Aquino ug Hontiveros nga mudagan pagka-presidente sa 2028 ubos sa nagkahi-usang oposisyon, apan si Robredo gihapon ang gi-isip nga pinakakusog o winnable candidate.
Sigon usab ni kanhi budget secretary Florencio “Butch” Abad, usa ka haligi sa Liberal Party, pareho silang bukas, apan kinahanglan pa silang molibot ug sukdon ang pagbati sa katawhan sa rason nga lahi na matud pa kaayo ang kahimtang sa politika karon kumpara sa tuig 2022 ilabian sa daghang nahitabo karon sa politika – mugna sa pagpanikas sa badyet, anaa pa ang mga impeachment cases nga gisang-at, ug ang makapahibulong nga resulta sa 2025 midterm elections – rason nga lisod matud pang matagna kung unsay mahitabo sa 2028.
Gipadauag kini ni Abad human sa reunion nga iyang gitambongan uban nila Hontiveros, Aquino, Robredo, Sen. Francis Pangilinan, kanhi Senate president Franklin Drilon, Akbayan party-list Rep. Chel Diokno, ug Mamamayang Liberal (ML) party-list Rep. Leila de Lima.
Gibutyag ni Abad nga si Robredo, dili na interesado nga modagan pagka-presidente, sama sa iyang kanunay nga gipadayag sa publiko, human napildi ni Ferdinand Marcos Jr sa 2022, diin ang iyang ka-running mate nga si Pangilinan nga napildi usab ni Bise Presidente Sara Duterte.
