BUTUAN CITY – Gisubmite na sa Pasay Regional Trial Court ang kaso sa cyber libel nga gisang-at ni Senator Risa Hontiveros batok kang Michael Maurilio, alyas “Rene” — kanhi testigo sa Senado batok sa Kingdom of Jesus Christ (KOJC) leader Apollo Quiboloy nga sa kaulahian, nag-akusa sa senadora og pagpangilad.
Sumala ni Prosecutor General Richard Anthony Fadullon, girekomenda sa DOJ ang pagpasaka og kaso batok kang Maurilio alang sa cyber libel.
Si Maurilio kaniadto miapil sa usa ka viral video niadtong Hunyo 2025 diin giangkon niya nga gibayran o gipugos siya ni Hontiveros aron maghatag og bakak nga testimonyo batok kang Quiboloy, kanhi Presidente Rodrigo Duterte, ug Bise Presidente Sara Duterte.
Gikumpirma ni Hontiveros nga si Maurilio usa sa mga testigo sa committee hearings kabahin sa alegasyon sa abuso sulod sa KOJC, apan iyang gipakita ang mga screenshot nga nagpamatuod nga si Maurilio mismo ang midool sa iyang staff ug nangayo og pinansyal nga tabang.
Gisalikway kini sa staff apan nagtanyag nga i-konekta siya sa organisasyon nga motabang sa mga biktima sa trafficking.
Giklaro usab ni Fadullon nga si Maurilio dili apil sa mga respondent sa gi-dismiss nga cyber libel complaint batok kang Atty. Ferdinand Topacio ug pipila ka social media personalities.
