BUTUAN CITY – Padayon pa ang imbestigasyon sa kapulisan sa General Santos City sa pagpamusil nga natigayon nga mipatay sa drayber sa traysikol ug sa iyang pasaheroning mi-aging alas 2:30 sa hapon, sa Aparente Street, Barangay City Heights, sa siyudad sa Gensan.
Ang biktimang namatay gi-ila nga si Iven Miano Conde, 32 anyos, residente sa Lower Nopol Klinan 5, Brgy. Mabuhay samtang ang iyang pasahero nga si Nhiezer Rolliene Jane Aguacito, 24 anyos, usa ka nurse ug residente sa Oringo Subdivision, Brgy. City Heights, patay usab sa maong hitabo.
Sumala sa kapulisan, samtang nagabiyahe ang mga biktima, kalit silang gipusil sa duha ka wala pa mailhing suspek nga nagsakay sa motorsiklo kondiin dali silang gidala sa ospital apan gideklara nang patay si Conde.
Sigon ni PCol. Nicomedes Olaivar Jr., City Director sa GSCPO, padayon ang hot operations ug pag-monitor sa CCTV footage aron madakpan ang mga suspek ug mahibal-an ang motibo sa maong krimen.
