BUTUAN CITY – Gipasalig sa Department of Health (DOH) nga wala pay aktibong mga kaso sa Nipah Virus dinhi sa nasod samtang padayon ang pagpangandam aron malikayan ang pagsulod sa maong virus sa mga border sa Pilipinas.
Sumala ni DOH Assistant Secretary Albert Domingo, apil ang Pilipinas sa mga nasod nga nagpahugot sa pag-monitor sa mga mosulod ug mogawas sa ilang mga border, lakip na ang Taiwan ug Thailand, tungod gihapon sa hulga sa maong sakit.
Base sa ilang padayon nga monitoring, wala pay natalang mga lumulupyo nga adunay mga sintomas o kasaysayan sa exposure sa Nipah Virus.
Gipasabot pa sa tigpamaba sa DOH nga, subay sa datos nga gihatag sa India, duha ra ka kumpirmadong kaso sa virus ang natala sa ilang nasod.
Nakahimo na usab sila og tracing ug isolation sa halos 200 ka tawo nga tanan nag-negatibo sa virus ug gituohan nga “contained” pa kini sa karon.
Tungod niini, mas gipahugtan pa ang pagpatuman sa mga naglungtad nga patakaran sa mga tugpahanan, ilabina sa Ninoy Aquino International Airport (NAIA), diin nagbutang na ang DOH og mga dedicated spotter nurses aron bantayan ug obserbahan ang mga nangabot nga pasahero alang sa mga timailhan ug sintomas sa sakit.
