BUTUAN CITY – Giduso na karong buntaga, Pebrero 2, sa Makabayan bloc ang impeachment complaint batok kang Vice President Sara Duterte sa Office of the Secretary General sa House of Representatives may kalabutan sa gika-ingong mga iregularidad sa paggamit sa confidential funds sa iyang opisina.
Sumala ni Renato Reyes Jr. sa Makabayan, tumong sa maong lakang nga patubagon ang mga opisyal nga naglapas sa pagsalig sa publiko ilabina nga ang isyu sa confidential funds dugay na nga kontrobersyal sukad pa niadtong 2023, dihang nabulgar ang ₱125 milyones nga pundong gibalhin gikan sa Office of the President padulong sa Office of the Vice President (OVP).
Niadtong 2025, usa ka impeachment complaint batok kang Duterte ang gibasura tungod sa constitutional bar nga nagdili sa labaw sa usa ka impeachment proceeding sulod sa usa ka tuig.
Nasayrang karong Pebrero 6 pa mahuman ang maong one-year bar rule ug ang subling gipasakang reklamo, gilauman nga mahimong sentro sa init nga diskusyon sa Kongreso.
Sa kinatibuk-an, nagpabiling dakong hagit sa administrasyon ang isyu sa confidential funds, uban sa saad sa Makabayan bloc nga batugan ang transparency ug accountability sa panggobyerno.
