BUTUAN CITY – Gipadayag ni Bicol Saro party-list Rep. Terry Ridon nga ang resulta sa duha ka impeachment complaints nga pending batok kang Pangulong Ferdinand Marcos Jr. sa House of Representatives magdepende sa ebidensya batok kaniya ug sa konsensya sa mga magbabalaod.
Kini subay na sa gitakdang unang hearing sa House Committee on Justice ugmang adlawa, Lunes sa managlahing reklamo nga gisubmite ning mi-aging bulan sa abogadong si Andre de Jesus ug sa Makabayan coalition kansa mao ang unang mga impeachment complaints nga napasaka batok sa presidente sukad sa iyang paglingkod sa pwesto niadtong 2022.
Dugang ni Ridon, ang bisan unsang opinyon o baruganan nga gikan sa gawas sa Kamara walay epekto sa desisyon sa mga magbabalaod, tungod kay ang impeachment mao ang eksklusibong gahum matud pa sa lehislatura nga nagsubay gihapon sa mga patakaran sa Konstitusyon.
Hatagan matud pa og higayon ang mga complainants nga ipresentar ang basehan sa ilang mga akusasyon sa pagsugod sa mga hearing.
Kabahin usab sa sulod sa mga alegasyon, gipadayag ni Ridon karon pa lang, ang pipila ka parte sa mga reklamo, sa iyang tan-aw kulang sa mga konstitusyonal nga basehan nga gikinahanglan alang sa pagpa-impeach sa pangulo ilabina ang gika-ingong pagtugot sa presidente sa pagkidnap ug pagtugyan kang kanhi Pangulong Rodrigo Duterte ngadto sa International Criminal Court (ICC).
Mahitungod usab sa gika-ingong kapakyas ni Marcos pag-veto sa unprogrammed appropriations sa gisugyot nga national budgets gikan 2023 hangtod 2026, gipadayag ni Ridon nga kini na ang praktis sukad pa niadtong 1989.
