BUTUAN CITY- Usa ka hugpong sa mga koordinadong pagpamusil ug pagbuto sa habagatang-kasadpang probinsya sa Baluchistan sa Pakistan diin nakapatay og 31 ka sibilyan ug 17 ka sakop sa seguridad, samtang ang mga pwersa sa kasundalohan nakapatay og labing menos 145 ka mga tig-atake, sumala ni Chief Minister Sarfraz Bugti.
Ang Balochistan Liberation Army kon BLA mitug-an sa responsibilidad sa mga pag-atake nga mitarget sa kapulisan, paramilitary ug mga pasilidad sa gobyerno sa 12 ka siyudad lakip ang Quetta, kansa giisip nga usa sa labing makamatay nga adlaw sa dugay nang insurgency sa rehiyon.
Gipangserado ang pipila ka mga building, gisuspinde ang serbisyo sa tren ug gi-jam ang mobile networks samtang nagpadayon ang kagubot, samtang si Prime Minister Shehbaz Sharif nanumpa nga ipadayon ang gubat batok sa terorismo hangtod sa hingpit nga pagwagtang niini.
Giakusahan sa Pakistan ang India nga nagasuporta sa mga rebelde, apan kini gideny sa Delhi, samtang nagpadayon ang tensiyon sa rehiyon nga dato sa natural nga rekurso apan pobre gihapon ug dugay nang giyera sa separatis ug mga alegasyon sa paglapas sa tawhanong katungod.
