BUTUAN CITY – Dili ideklara ni Pangulong Ferdinand “Bongbong” Marcos Jr. si Chinese Ambassador to the Philippines Jing Quan nga persona non grata bisan pa sa panawagan sa pipila ka mga senador aron mapapahawa na ang mga opisyal sa Chinese Embassy tungod sa isyu sa West Philippine Sea.
Sumala ni Palace Press Officer Atty Claire Castro, bisan og 15 ka mga senador ang mipirma sa resolusyon nga nagkondena sa mga pamahayag sa Chinese Embassy sa Manila apan gusto sa pangulo nga masulbad ang word war pinaagi sa firm action with diplomacy.
Ang Department of Foreign Affairs (DFA) nagpasabot nga ang pagdeklara og persona non-grata mahimong last resort ug usa sa pinakagrabe nga diplomatic action nga mahimong ipatuman.
Sumala ni DFA Secretary Ma. Theresa Lazaro, aduna kini dagkong epekto sa relasyon sa Pilipinas ug China ug kinahanglan nga timbang-timbangon ug hunahunaon una pag-ayo.
Gisiguro usab sa DFA nga padayon ang direktang komunikasyon sa Chinese government aron masulbad ang mga isyu pinaagi sa dialogue ug consultation.
Sa miaging pahayag, ang Chinese Embassy sa Manila nag-ingon nga si Ambassador Jing Quan mobiya dayon sa Pilipinas kung ideklarar siya nga persona non grata.
