BUTUAN CITY – Gipahunong na sa gobyerno sa Indonesia ang tanang elephant rides sa tibuok nasud, usa ka dakong kadaugan alang sa animal welfare ug ethical wildlife tourism.
Nagsugod ang kampanya sa pagdili human ang Asia division sa People for the Ethical Treatment of Animals (PETA) naglusad og imbestigasyon sa elephant rides sa Bali, usa sa mga sikat nga tourist spot, sa katapusan nga tuig.
Sumala sa PETA, bisan unsang pasilidad nga nagtugot sa direkta nga interaksyon sa mga elepante — sama sa pagsakay, pagligo, pagpakaon, o pagkuha ug litrato — mahimong peligro sa hayop ug sa mga bisita.
Gipadayag pa sa PETA nga daghang elepante ang nakit-an nga nakagapos, naay samad ug pilas, kansa gipanghapak sa mga handlers taliwa nga gigamitan kini og mga bullhooks aron mapugos silang mu-apil sa mga kalihokan pang‑turista.
Ang Indonesian Ministry of Forestry pinaagi sa Directorate General of Natural Resources and Ecosystem Conservation, nagpagawas og circular nga nagdili sa elephant rides sa tanang conservation ug tourism facilities.
Ang Bali Zoo mao ang usa sa unang misunod sa direktiba, nga suportado usab sa Southeast Asian Zoos and Aquariums Association nga gisundan pa sa Mason Elephant Park sa Bali.
Sa kasamtangan, ang mga silingang nasud sa Southeast Asia sama sa Thailand, Vietnam, Laos, ug Cambodia, ug uban pang nasud sa Asia sama sa India ug Nepal, nagpadayon pa gihapon sa elephant rides.
