BUTUAN CITY – Nagduso na og reklamong pagpangawat og mga minerales kansa paglapas sa Republic Act 7942 kon mas nailang Philippine Mining Act of 1995 ang Criminal Investigation and Detection Group kon CIDG-Caraga batuk sa 17 ka mga small-scale miners nga nadakpan atol sa gilusad nga anti-illegal mining operations niadtong Biernes, Enero 23 sa Sitio Sopon, Brgy Alegria, lungsod sa San Francisco, Agusan del Sur.
Sa eksklusibong pakighinabi sa Bombo Radyo Butuan, gipadayag ni PMajor Dorothy Tumulak, hepe sa Operations Division sa Police Clearance and Records Section kon PCRS sa CIDG-Caraga, pulos nga Pinoy ang nangadakpan ug gikostudiya na sa detention facility sa San Francisco Municipal Police Station.
Gilusad matud pa ang operasyon uban sa mga sakop sa Department of Environment and Natural Resources kon DENR-Caraga human na-verify ang kamatu-uran sa nadawat nga reklamo gikan sa usa ka concerned citizen.
Apil sa ilang gisuta kung duna ba’y langyaw’ng financier sa nasangpit nga mga minero ilabina nga na-isyuhan na kini og cease and desist order niadto pang Mayo ning mi-aging tuig.
Dugang pa ni Major Tumulak, ubay-ubay na mga ebidensya nga gibana-banang nagkantidad og 510-mil pisos ang nakumpiska sa maong operasyon nga magamit matud pa sa ila unyang ipasakang kaso.
Apil na niini ang 55 ka mga sakop sa mga rock materials nga gitu-uhang duna’y namilit nga mga bulawan, chain saw, water pump ug uban pa.
Sa pagkakaron, gihulat na lang nila ang resolusyong ipagawas sa piskaliya aron masayran usab kung pila ang pyansang irekomenda alang sa ila unyang temporaryong kagawasan.
