BUTUAN CITY – Gibarugan ni Kapitan Gillberto Enriquez sa Brgy Doongan ning siyudad sa Butuan nga igo lang silang nagsunod sa demolition order nga gipagawas sa korte hinungdan nga na-demolish ang mga balay sa Purok 3 kagahapon.
Sa eksklusibong pakighinabi sa Bombo Radyo Butuan, gipadayag sa kapitan nga aminadong kasayod siya nga duna’y duha ka claimants ang maong yuta apan ang korte na matud pa ang midetermina sa tinuod nga tag-iya niini.
Iyang gipasabot nga dili mugawas ang demolition order gikan sa korte kung wala matud pa kini legal nga basehan usab base sa ilang gikuptang mga ebidensya ug dokumento.
Gipadayag usab sa kapitan nga mahimong temporaryong mupuyo sa ilang covered court ang mga apektadong pamilya nga wala matud pa’y angayang kabalak-an sa ilang kunsumo tungod kay mag-provide niini ang barangay council ug ang City Social Welfare and Development.
Gawas pa, prayuridad usab ang mga subject sa demolisyon sa relocation site nga gitagana sa city government didto sa Brgy Sto Niño ug Bargy Mahay ning siyudad.
