BUTUAN CITY -Nakit-an na usab ang barko sa China Coast Guard 5901 kansa gitawag nga “monster ship” sa West Philippine Sea.
Sumala sa monitoring sa usa ka US maritime expert, kini ang unang higayon nga nakita pag-usab ang dakong barko sa China sa maong lugar human sa halos usa ka tuig.
Sumala ni US maritime expert Ray Powell, ang barko sa CCG nakahimo pa og intrusive patrol duol sa central Vietnam, nga mao ang unang deployment sa barko sa habagatan sa Hainan Island sukad niadtong Hulyo 2025.
Miagi usab kini sa gilay-on nga 74 ka kilometro duol sa lungsod sa Itbayat sa probinsya sa Batanes niadtong Domingo kondiin kadiyot lamang kining nagpabilin sa lugar sa wala pa kini mobalik pa-kasadpan nga direksyon.
Kagahapon sa buntag, nakita nga hapit na kini mubalik sa Hainan Island.
Mahinumduman nga ang katapusang higayon nga nakita ang monster ship sa China sa Panatag o Scarborough Shoal niadtong Pebrero sa miaging tuig. Sumala kang Powell, nagpabiling hilom ang barko atol sa 2025 ug posible nga nagpuyo ra kini duol sa baybayon sa China.
