BUTUAN CITY – Gipakatag na sa kagamhanan sa Pilipinas ang usa ka grupo sa mga pulis didto sa Cambodia aron pangitaon ang puganteng gaming tycoon nga si Charlie ‘Atong’ Ang.
Sigon ni Department of Interior and Local Government Sec Jonvic Remulla, duna na usab sila’y gihimong mga berepikasyon ning nakalabay’ng mga adlaw tungod sa nga posibilidad nga misibat na kini padulong sa maong nasud o kaha sa Thailand aron malikayan ang pag-aresto kaniya human gipagawas ang arrest warrant tungod sa mga kasong iyang gi-atubang.
Sigon sa kalihim, gisusi na sa kapulisan ang tanang posibilidad ug nakig-alayon na sila sa mga otoridad sa Cambodia aron sayron ang posibleng nahimutangan sa wanted nga gaming tycoon.
Aminado usab kining wala pa sila’y nadawat nga intelligence report kalabot sa nahimutangan niini ug nagtuo siya nga duna’y igong kwarta si Ang nga iyang magamit aron makalikay sa mga otoridad.
Sa nakalabay’ng mga semana, mi-abot na sa 18 ka mga lokasyon ang nasuhid sa mga otoridad nga gitu-uhang gitaguan ni Ang kondiin pulos negatibo ang resulta. Samtang ang Criminal Investigation and Detection Group kon CIDG, nakadawat usab og 40 ka mga tips gikan sa mga informants nga nagtudlo sa posibleng gitaguan ni Ang didto sa Luzon area.
