BUTUAN CITY – Kapin sa 300 ka mga binhi sa mga similya sa fruit-bearing ug indigenous trees ang gitanom sa may Zoological and Botanical Garden sa Barangay Sumile ning siyudad isip kabahin sa pagsa-ulog sa Butuan City sa Watershed Consciousness Week.
Gipasabot ni Engr Albert Arcamo, hepe sa Butuan City Environment and Natural Resources Department nga kabahin ang tree planting sa maong kasa-ulugan tungod kay ang kahoy adunay dakong papel sa pagpanalipod ug pagpreserba sa watershed, nga maoy tinubdan sa atong suplay sa tubig.
Gipili nga itanom ang ang fruit trees aron kung mamunga na, mahimo kining pagkaon sa mga wildlife kon ihalas nga mga mananap, samtang ang indigenous trees gitanom aron mapalambo ug mapadaghan ang mga lokal nga species sa kahoy nga makatabang sa pagmintina sa eco-system.
Ang tree-planting nagpakita sa panaghi-usa sa mga Butuanons diha sa pagpanalipod sa kina-iyahan ug pagpreserba sa watershed alang sa umaabot nga henerasyon ilabina nga importanteng asset ang watershed nga kinahanglan ampingan ug protektahan.
