BUTUAN CITY – Gitu-uhang ania pa gihapon sa Pilipinas ang puganteng kanhi Bureau of Corrections (BuCor) Chief Gerald Bantag ug posibleng nagatago lang sa Cordillera Region.
Sigon Department of the Interior and Local Government (DILG) Secretary Jonvic Remulla, base sa ilang pinakabag-ong impormasyon, anaa si Bantag sa maong rehiyon ug nag-deploy na matud pa sila og pipila ka mga tracker teams aron pangitaon ang kanhi opisyal sa BuCor.
Apan dugang ni Remulla, angay usab sabton nga lisod kaayo pangitaon ang Cordillera Region tungod sa kabukiron niini, ug dili usab posible nga gamitan og drone kay matabonan kini sa mga kahoy.
Tungod niini, naglaum gihapon ang mga otoridad sa human intelligence taliwala sa mga hagit nga ilang gi-atubang kondiin determinado gihapon ang mga otoridad nga matud-an si Bantag uban ang ubang mga pugante gamit ang tanang resources.
