BUTUAN CITY – Giklaro ni Atty. Ferdinand Topacio, legal counsel ni kanhi Negros Oriental 3rd District Representative Arnolfo Teves Jr., nga dili pa makagawas si Teves sa pagkabilanggo bisan og na-abswelto kini sa usa ka kasong murder, tungod sa duha ka pending nga kaso nga gi-atubang niini.
Ang maong mga kaso may kalabotan sa gika-ingong pagka-utok ni Teves sa pagpatay sa usa ka board member niadtong tuig 2019 na si anhing Miguel Lopez Dungog.
Sumala ni Topacio, base sa ruling sa Manila Regional Trial Court Branch 15, gi-grant ang gi-file nga demurrer to evidence kondiin gipadayag sa korte nga napakyas ang prosekusyon sa pagpatunhay og prima facie case, hinungdan nga gi-abswelto si Teves.
Apan, matod sa Department of Justice (DOJ), wala pa sila nakadawat og opisyal nga kopya sa maong desisyon gikan sa korte.
Gipasalig usab sa DOJ nga gamiton nila ang tanang legal remedies kung madawat na sa prosecution panel ang opisyal nga dokumento.
Samtang, dako ang pagsalig ni Topacio nga sunod nga mabasura ang duha pa ka kaso batok kang Teves, ilabina ang duna’y kalabutan sa pagpatay kang kanhi Negros Oriental Governor Roel Degamo niadtong 2023 uban sa lain pang mga indibidwal.
