BUTUAN CITY – Misaka na sa 22 ka patay tungod sa nahunlak nga Binaliw landfill sa Cebu City human nakit-an ang patay’ng lawas sa usa ka babaye kaganinang alas-6:30 sa buntag ug usa ka lalaki pasado alas-6:51 sa buntag.
Gawas sa mga namatay, 18 ka tawo ang nasamdan ug karon gitambalan sa lain-laing mga ospital ug 14 pa ang nagpabiling missing ug padayon pang gipangita sa mga rescuers.
Nagpadayon ang search and retrieval operations sa Cebu City Disaster Risk Reduction and Management Office (CCDRRMO) uban sa Philippine Coast Guard, Bureau of Fire Protection, ug mga volunteer groups. Sumala sa Department of Environment and Natural Resources (DENR), andam sila nga mohatag og tabang ug magpatuman og mga lakang aron matabangan ang mga naapektuhan sa insidente.
Susihon usab nila ang kahimtang sa landfill aron masiguro nga dili na ma-usab ang maong trahedya.
Naghatag na usab og tabang ang operator sa landfill ngadto sa mga pamilya sa mga biktima ug sa mga rescuers nga padayong mihimo sa ilang operasyon.
Gilauman usab nga modaghan ang basura sa Cebu sa mosunod nga mga adlaw ilabina kay nagkadool na ang Sinulog Festival, rason nga nanawagan ang lokal nga kagamhanan og dugang nga suporta gikan sa nasyunal nga mga ahensya.
