BUTUAN CITY – Napili si People’s Champ Manny ‘Pacman’ Pacquiao isip Global Outstanding Sporting Career Awardee sa pinaka-unang World Sports Summit sa Dubai nga gihatag ni Sheikh Ahmed bin Mohammed bin Rashid Al Maktoum, ang second deputy ruler sa Dubai ug presidente sa UAE National Olympic Committee.
Gipahigayon ang World Sports Summit sa Madinat Jumeirah, Dubai kondiin ang maong award – usa ka pag-ila sa iyang wala’y katupngang kontribusyon sa boxing ug sports sa kalibutan.
Apil sa mga gipasidunggan sila Novak Djokovic alang sa tennis; Khabib Nurmagomedov sa mixed martial arts kon MMA; Ronaldo Nazário sa football; Tony Parker sa basketball ug uban pa.
Nasayrang si Pacquiao gi-ila dili lang isip boxing legend apan sports ambassador usab nga nagdala ug inspirasyon sa mga atleta ug kabatan-onan sa tibuok kalibutan ug ang maong award, nagdugang sa daghang internasyonal nga pag-ila sa 47-anyos nga Pinoy boxer nga iyang nadawat sukad sa pagretiro sa professional boxing ug pagbalhin sa politika.
Ang pagkahimong sporting icon sa Dubai Summit nagpalig-on sa reputasyon ni Pacquiao nga usa sa pinakadako nga atleta sa kasaysayan sa kalibutan.
