BUTUAN CITY – Doble ang kaguol nga gibati sa amahang si Joel Padrelana, residente sa Brgy Holy Redeemer ning siyudad human namatyan og anak sa pagtungtong gayod sa bag-ong tuig 2026, usa ka semana lang human usab nasunog ang ilang panimalay niadtong mismong adlaw sa Pasko kondiin didto pa kini namatay sa ilang gisak-ang evacuation center.
Sa eksklusibong pakighinabi sa Bombo Radyo Butuan, gipadayag sa amahan nga dili niya makalimtan kining tuiga ilabina nga mao pa unta’y pag-uban nila sa iyang 14-anyos nga anak nga lalaki human niya kini gikuha gikan sa nagpadako kaniya dihang nasayran nga gipasagdan na kini human naparalisa ang mga tiil rason nga dili na makalakaw.
Wala matud pa sila’y kasayuran sa hinungdan sa pagkaparalisa niini tungod kay dili man kini musulti apil na ang nagpadako kaniya.
Dugang pa sa amahan nga nagdulog pa sila pagpangatulog niadtong Disyembre 31 sa gabii ug pagka-Enero 1, gi-apas na lang siya sa trabahuon ug gipahibalo sa nadangatan sa iyang anak.
