BUTUAN CITY – Gi-awhag ni Pope Leo XIV atol sa iyang unang Christmas message ngadto sa katawhan sa St Peter’s Square, ang Ukraine ug Russia nga magbaton og ka-isog sa pagpahigayon og direktang dayalogo aron tapuson na ang ilang giyera.
Iya usab nga gipanawagan ang pagtapos na sa kagubot sa tibuok kalibutan atol sa iyang Urbi et Orbi address, nga na-andan nang ihatag sa pontiff sa mismong adlaw sa Pasko ngadto sa mga manimbahay nga magtapok sa Vatican City.
Nakatutok ang unang Christmas Urbi et Orbi ni Pope Leo XIV sa pangkalibutanong responsibilidad isip yawe sa kalinaw, dayong pasabot sa kasakit nga gi-atubang sa katawhan sa Gaza ug Yemen.
Gipahimangnoan usab ni Pope Leo, nga ang pag-ila sa kakulang ug pagtabang sa mga kabus makapabag-o sa kalibutan, subay sa pagtulon-an nga si Kristo ang atong kalinaw.
Gipasalamatan usab sa Santo Papa, ang mga Kristiyano ilabina sa tunga-tungang Sidlakan dayong pa-ambit sa iyang biyahe sa Turkey ug Lebanon, samtang gi-ampo ang hustisya, kalinaw ug kalig-on sa Lebanon, Palestine, Israel, Syria, ug Ukraine, uban sa hangyo sa diyalogo ug pagtapos sa gubat.
Mi-apela usa kini alang sa kalinaw sa Sudan, South Sudan, Mali, Burkina Faso, Democratic Republic of Congo, Haiti, ug Myanmar, diin nagpadayon ang gubat, kawalay hustisya, kawalay kalig-on sa politika, pag-usig sa relihiyon, ug terorismo.
