BUTUAN CITY – Gipasakaan og kasong plunder, graft, ug technical malversation sa grupong Save The Philippines Coalition si Executive Secretary Ralph Recto ug ang kanhi Presidente sa Philippine Health Insurance Corp. (PhilHealth) nga si Emmanuel Ledesma Jr tungod sa pagbalhin sa P60-bilyon nga sobrang pondo sa PhilHealth ngadto sa national treasury.
Sa 15 ka palid nga reklamo nga gisubmite sa Office of the Ombudsman, nanawagan sila nga tangtangon sa ilang pwesto sila Recto ug Ledesma.
Sigon sa mga nagreklamo nga sila Irene Caballes, Elmer Jugalbot, Gerlyn Ogong, Emerita Pecson, Susan Villar, Mussolini Lidasan, Jose Olivar, ug Jaime Miralles, klaro matud pa ang mga paglapas nga gihimo sa maong mga opisyal human nga gipugos ni Recto, nga kaniadto mao ang Finance Secretary, ang pagbalhin sa pundo ngadto sa national treasury bisan pa man nga gidili kini sa balaod.
Samtang si Ledesma angayan usab matud pang manubag tungod kay iyang gitugotan ang pagbalhin sa maong pundo.
Mahinumduman nga niadtong Disyembre 3, nagpagawas og kamanduan ang Korte Suprema nga ibalik sa PhilHealth ang P60-bilyon nga pondo nga nadeposito sa National Treasury.
