BUTUAN CITY – Gisugdan na sa Department of Education (DepEd) Central Office ang coordination meeting alang sa 2026 Palarong Pambansa sa Bayugan City, Agusan del Sur kagahapon Martes.
Gipangunahan kini nila Undersecretaries Malcolm Garma ug Peter Irving Ervin Corvera kauban ang Palarong Pambansa Secretariat nga gipangunahan usab ni Director Marivic Tolito, samtang sila Governor Santiago Cane ug DepEd Caraga Regional Director Maria Ines Asuncion ang nag-chair sa maong komite.
Lakip sa gihimo ang paghatag og giya ug teknikal nga tabang sa nagkalain-laing komite sa palaro ingon man ang site inspections sa mga venues sama sa Salvacion Evacuation Center, Bayugan Central Elementary School ug Agusan del Sur College, apil na ang nagpadayong konstruksyon sa Datu Lipus Makapandong D.O. Plaza Sports Complex sa Brgy Patin-ay lungsod sa Prosperidad.
Gipakita usab ang kahimtang sa mga atleta nga nagbansay sa swimming center, kansa nagpakita sa kamahinungdanon sa maayong preparasyon ug kaluwasan.
Natapos ang adlaw pinaagi sa welcome dinner nga gipangunahan ni Governor Cane nga nagpalig-on sa pakig-uban sa DepEd ug lokal nga kagamhananan aron masiguro ang usa ka organisado ug malampusong Palarong Pambansa.
