BUTUAN CITY – Gipatuman na karon sa Australia ang pagdili sa paggamit sa social media alang sa kabatan-onan nga wala pa’y 16-anyos.
Gipadayag ni Prime Minister Anthony Albanese nga kini nga lakang maghatag og mas luwas nga pagsugod sa online world para sa mga bata.
Sugod karong adlawa, ang mga nag-unang social media platforms, obligado nang magpatuman og age verification systems ug ang mga kompanya nga mosupak sa balaod mahimong magmulta og hangtod $50 milyon.
Tumong sa bag-ong regulasyon nga maprotektahan ang mental health sa kabatan-onan batok sa cyberbullying, online exploitation, ug pagkahimo’g adik sa social media.
Daghang ginikanan ang mipadayag og suporta tungod kay maminusan na ang ilang kabalaka sa kahimtang sa ilang mga anak sa online environment.
Sa mensahe ni Albanese, iyang gibutyag nga kini usa ka makasaysayanong lakang nga magmugna og sumbanan alang sa ubang nasod diha sa digital age.
